ഉണങ്ങിയ ആ മരത്തിന്റെ ഒരു ചില്ലയില്
ഒറ്റപ്പെട്ട ഒരു പച്ചിലപോലെ ഒരു കിളി.
വിഷാദം ബാധിച്ച ഒരു തവിട്ടുനിറം
അതിന്റെ കഴുത്തില് പടര്ന്നുകിടന്നിരുന്നു...
താഴെ, ചരല്മണ്ണില് ചിതറിക്കിടക്കുന്ന
നാരുകളിലേക്കു നോക്കി,
കണ്കളില് നിരാലംബഭാവവുമായി ആ കിളി...
മരത്തിന്റെ നെഞ്ചില് മഞ്ഞച്ചായവും,
അതിനുമേല് കറുത്ത വരകളും...
വരാന്പോകുന്നതിനെക്കുറിച്ചാലോചിച്ചാവാം,
തലയൊന്നുവെട്ടിച്ച്, കിളി ഒന്നനങ്ങി.
ദൂരെ, മരത്തെയും കിളിയെയും നോക്കി
നിര്വ്വികാരനായി നില്ക്കുന്ന എന്നെ
പുച്ഛത്തില് ഒന്നു നോക്കിയിട്ട്
അത് തിടുക്കത്തില് പറന്നുപോയി.
(അതിരപ്പള്ളി, 1999)
Subscribe to:
Post Comments (Atom)
No comments:
Post a Comment