അഴിമുഖം ശാന്തമാണ്.
കുറച്ചുദൂരെ, കടല് കരിങ്കല്ഭിത്തിയോട്
കലഹത്തിലാണ്.
തീക്ഷ്ണമായ കലഹം.
പക്ഷേ,
ഇവിടം ശാന്തമാണ്.
ദൂരെ, മലകളില് നിന്നു തുള്ളിയെത്തുന്ന
പുഴയും ശാന്തയാണിവിടെ.
ഒരു സമാഗമത്തിന്റെ സന്തോഷാശ്രുക്കളുടെ
ഉപ്പുരസം..., ഒരു നിറവ്.
നോക്കൂ...,
കടലിവിടെ എത്ര സൗമ്യമായാണ്
പുഴയെ സ്വീകരിക്കുന്നത്!
പരകോടി അദ്ഭുതങ്ങളില്നിന്ന്
ഒരു നുള്ള് നമുക്കു നേരെ വാരിയെറിഞ്ഞ്,
കള്ളച്ചിരിയൊതുക്കുന്ന കടല്.
സ്വര്ണ്ണം ഉരുകിയൊലിക്കുന്ന തീരങ്ങള്.
കാതുകളില് ഇക്കിളികൂട്ടുന്ന കാറ്റ്.
പൊഴിനിറച്ചും സ്നേഹത്തിന്റെ തിരകള്.
ചുറ്റും ശാന്തിയുടെ സംഗീതം.
അഴിമുഖം ശാന്തം.
(1998-99, കൊളാവിപ്പാലം, പയ്യോളി)
No comments:
Post a Comment